Elegia, Coelius Sedulius

Cantemus socii, Domino cantemus honorem :
    Dulcis amor Christi personet ore pio.
Primus ad ima ruit magna de luce superbus,
    Sic homo cum tumuit, primus ad ima ruit.
Unius ob meritum cuncti periere minores,
    Salvantur cuncti unius ob meritum.
Sola fuit mulier, patuit qua janua leto :
    Ex qua vita redit, sola fuit mulier :
Frater iniquus erat, justum qui perculit olim :
    Damnator Christi frater iniquus erat.
Transitus ille monet, quid prima amisit origo,
    Quid ventura parent, transitus ille monet.
Arca levatur aquis, homines ne perderet æquor :
    Ne pereant homines, arca levatur aquis.
Sume pater populos pro nati vulnere cunctos :
    Quum tradis Christum, sume Pater populos.
Hostia summa patris, tacitis signata figuris :
    Quam referat Christus hostia summa patris.
Claudicat ecce videns Dominum, dum prævalet heros
    Aspera gens Christum claudicat ecce videns.
Reppulit ille famem, venitus crimine fratrum :
    Venditus est Christus, reppulit ille famem.
Perfide corde peris, dum vastant omnia plagæ :
    Dum cessant plagæ, perfide corde peris.
Agnus ab hoste sacer revocavit sanguine patres :
    Sanguine nosque refert agnus ab hoste sacer.
Obruit unda nefas, populo gradiente per æquor :
    Nunc mundi populis obruit unda nefas.
Murmurat impietas, manna veniente refecta :
    Panis adest Christus, murmurat impietas.
Plebs sibi dura caput terræ cultoris adoptat :
    Abstulit heu Christum plebs sibi dura caput !
Lex dedit indicium veteris de crimine pænæ :
    Quodque salus veniat, lex dedit indicium.
En lapis irriguus : satiare incredule, fonte,
    Qui Christum reprobas : en lapis irriguus !
Carpitur igne sacro munus votumque piorum:
    Seditiosa tribus carpitur igne sacro.
Regna beata patris legis non contigit heres :
    Jesus dispensat regna beata patris.
Destruit arca dei muros, dum circuit hostem :
    Sic hostem mundi destruit arca dei.
Area vellus habet, madido sed vellere sicca est :
    Siccum tota madens area vellus habet.
Vincis honore dei promisso munere gentes :
    Adfectum natæ vincis amore dei.
Tu decus omne tuis, qui sternis cæde Goliam:
    Qui vincis mundum, tu decus omne tuis.
Maxima dona dei cuncti cecinere prophetæ :
    Implevit Christus maxima dona dei.
Pondera dura tulit mandatum legis et iram :
    Gratia mandati pondera dura tulit.
Virgo Maria nitet nullo temerante pudorem :
    Post partum pueri virgo Maria mitet.
Filius hic hominis fit maxima quæstio mundi :
    Nobiscum deus est filius hic hominis. ,
Gaudia magna dei mundus percepit et ambit :
    Respuit heu mundus gaudia magna dei.
Signa movent populos, cernunt magnalia cæci :
    Nulla tamen duros signa movent populos.
Aspera mors populis ligno deducta cucurrit :
    Aufertur ligno aspera mors populis.
Ipse tulit dominus pro pænis munera servis :
    Pro servis pænas ipse tulit dominus.
Vita beata necem miseris avertere venit :
    Pertulit a miseris vita beata necem.
Lumen adesse dei persensit tartarus ingens :
    Nec cernunt homines lumen adesse dei.
Mors fera per hominem miserum sibi subdidit orbem ;
    Subdita contremuit mors fera per hominem.
Suscitat ecce genus morti pater ille profanus :
    Ad vitam Christus suscitat ecce genus.
Hic populus dominum dura cervice negavit :
    Suscepit primum hic populus domimum.
Sanguine læta redit fuso gens impia Christi :
    Gustato Christi sanguine læta redit.
Crimina cuncta suis terrenus contulit auctor :
    Dissolvit Christus crimina cuncta suis.
Libera corda sibi facihus devinxerat olim :
    Nunc reficit Christus libera corda sibi.
Fortia vincla dedit peccati sæva potestas :
    Dulcis amor Christi fortia vincla dedit.
Jam super astra sedet, cuncti exsultate fideles :
    Perfide, quid sævis ? Jam super astra sedet.
Mortuus ille tonat, cælum terramque subegit :
    Quid facient hostes ? Mortuus ille tonat.
Pellitur umbra die, Christo veniente, figura :
    Christus adit gentes, pellitur umbra die.
Te properare docent et signa et sæcula prima :
    Nos sacra, quæ gerimus, te properare docent.
Unicus adveniens firmavit vota priorum :
    Vota dedit nobis unicus adveniens.
Passio, Christe, tui complevit munera legis
    Munera nostra replet passio, Christe, tui.
Hic homo qui deus est, spes est antiqua piorum :
    Spes in fine piis hic homo qui deus est.
Munus erat fidei toto credentibus ævo :
    Qui dedit, ut credant, munus erat fidei.
Te veniente, deus, mundanus concidit error :
    Occidet hic mundus, te veniente, deus.
Gratia plena dei est, quæ totis gentibus exstat :
    Abscedant sectæ, gratia plena dei est.
Sola columba redit, quæ totum circuit orbem :
    Discedant corvi, sola columba redit.
Adveniet dominus dare digna piis, mala pravis :
    Credite jam miseri, adveniet dominus.
Visio, Christe, tui, tormentum et pæna malorum est :
    Gloria cuncta bonis visio, Christe, tui.
Gloria magna Patri, semper tibi gloria, Nate,
    Cum sancto Spiritu, gloria magna Patri.