\section{Hymni de communi sanctorum} \subsection{Pro apostolis et evangelistis \\ extra tempus paschale} \paragraph{Ad Vesperas et Laudes} Exultet cœlum laudibus, Resultet terra gaudiis : Apostolorum gloriam Sacra canunt solemnia. Vos sæcli justi judices, Et vera mundi lumina, Votis precamur cordium, Audite preces supplicum. Qui cœlum verbo clauditis, Serasque ejus solvitis, Nos a peccatis omnibus Solvite jussu, quæsumus. Quorum præcepto subditur Salus et languor omnium, Sanate ægros moribus, Nos reddentes virtutibus, Ut cum judex advenerit Christus, in fine sæculi, Nos sempiterni gaudii Faciat esse compotes. Deo Patri sit gloria, Ejusque soli Filio, Cum Spiritu Paraclito, Et nunc et in perpetuum. \paragraph{Ad Matutinum} Æterna Christi munera, Apostolorum gloriam, Laudes canentes debitas, Lætis canamus mentibus : Ecclesiarum principes, Belli triumphales duces, Cœlestis aulæ milites, Et vera mundi lumina. Devota sanctorum fides, Invicta spes credentium ; Perfecta Christi charitas Mundi triumphat principem. In his paterna gloria, In his voluntas Spiritus, Exultat in his Filius. Cœlum repletur gaudio. Te nunc, Redemptor, quæsumus, Ut ipsorum consortio Jungas precantes servulos, In sempiterna sæcula. \subsection{Pro apostolis et evangelistis \\ tempore paschali} \paragraph{Ad Vesperas et Matutinum} Tristes erant apostoli De nece sui Domini, Quem morte crudelissima Servi damnarant impii. Sermone blando angelus Prædixit mulieribus : \og In Galilæa Dominus Videndus est quantocius. \fg Illæ dum pergunt concitæ : Apostolis hoc dicere, Videntes eum vivere, Christi tenent vestigia : Quo agnito, discipuli In Galilæam propere Pergunt videre faciem Desideratam Domini. Quæsumus, auctor omnium, In hoc paschali gaudio, Ab omni mortis impetu Tuum defende populurn. Gloria tibi, Domine, Qui surrexisti a mortuis, Cum Patre et sancto Spiritu, In sempiterna sæcula ! \paragraph{Ad Laudes} Claro paschali gaudio Sol mundo nitet radio, Cum Christum jam apostoli Visu cernunt corporeo. Ostensa sibi vulnera In Christi carne fulgida, Resurrexisse Dominum Voce fatentur publica. Rex, Christe, clementissime, Tu corda nostra posside, Ut tibi laudes debitas Reddamus omni tempore. Quæsumus, auctor omnium, In hoc paschali gaudio, Ab omni mortis impetu Tuum defende populum. Gloria tibi, Domine, Qui surrexisti a mortuis, Cum Patre et sancto Spiritu, In sempiterna sæcula ! \subsection{In festo unius martyris} \paragraph{Ad Vesperas et Matutinum} Deus tuorum militum Corona, sors, et præmium. Laudes canentes martyris Absolve nexu criminis. Hic nempe mundi gaudia, Et blandimenta noxia, Caduca rite deputans, Ovans tenet cœlestia. Pœnas cucurrit fortiter, Et sustulit viriliter ; Pro te effundens sanguinem, Æterna dona possidet. Ob hoc precatu supplici Te poscimus, piissime, In hoc triumpho martyris Dimitte noxam criminis. Laus et perennis gloria Deo Patri, et Filio, Sancto simul Paraclito, In sæculorum sæcula ! \paragraph{Ad Laudes} Martyr Dei, qui unicum Patris sequendo Filium Victis triumphas hostibus, Victor fruens cœlestibus, Tui precatus munere Nostrum reatum dilue, Arcens mali contagium, Vitæ removens tædium. Soluta sunt jam vincula Tui sacrati corporis : Nos solve vinclis sæculi Amore Filii Dei. Deo Patri sit gloria, Ejusque soli Filio Cum Spiritu Paraclito, Et nunc et in perpetuum. \subsection{In festo plurimorum martyrum} \paragraph{Ad Vesperas} Sanctorum meritis inclyta gaudia Pangamus, socii, gestaque fortia ; Nam gliscit animus promere cantibus Victorum genus optimum. Hi sunt quos retinens mundus inhorruit ; Ipsum nam sterili flore peraridum Sprevere penitus, teque secuti sunt, Rex Christe bone, cœlitus. Hi pro te furias, atque ferocia Calcarunt hominum sævaque verbera ; Cessit his lacerans fortiter ungula, Nec carpsit penetralia. Cæduntur gladiis more bidentium, Non murmur resonat, non querimonia ; Sed corde tacito mens bene conscia Conservat patientiam. Quæ vox, quæ poterit lingua retexere Quæ tu martyribus munera præparas ? Rubri nam fluido sanguine, laureis Ditantur bene fulgidis. Te, summa Deitas unaque, poscimus, Ut culpas abluas, noxia subtrahas, Des pacem famulis, nos quoque gloriam Per cuncta tibi sæcula. \paragraph{Ad Matutinum} Æterna Christi munera, Et martyrum victorias, Laudes canentes debitas, Lætis canamus mentibus. Terrore victo sæculi, Pœnisque spretis corporis, Mortis sacræ compendio Vitam beatam possident. Traduntur igni martyres, Et bestiarum dentibus ; Armata sævit ungulis Tortoris insani manus. Nudata pendent viscera, Sanguis sacratus funditur ; Sed permanent immobiles, Vitæ perennis gratia. Te nunc, Redemptor, quæsumus, Ut ipsorum consortio Jungas precantes servulos, In sempiterna sæcula. \paragraph{Ad Laudes} Rex gloriose martyrum, Corona confitentium, Qui respuentes terrea Perducis ad cœlestia, Aurem benignam protinus Appone nostris vocibus : Trophæa sacra pangimus, Ignosce quod deliquimus. Tu vincis in martyribus, Parcendo confessoribus : Tu vince nostra crimina, Donando indulgentiam. Deo Patri sit gloria, Ejusque soli Filio, Cum Spiritu Paraclito, Et nunc et in perpetuum. \subsection{In festo unius confessoris} \paragraph{Ad Vesperas et Matutinum} Iste confessor Domini sacratus, Festa plebs cujus celebrat per orbem, Hodie lætus meruit secreta Scandere cœli : Qui pius, prudens, humilis, pudicus, Sobrius, castus fuit, et quietus, Vita dum præsens vegetavit ejus Corporis artus : Ad sacrum cujus tumulum frequenter Membra languentum modo sanitati, Quolibet morbo fuerint gravata, Restituuntur : Unde nunc noster chorus, in honorem Ipsius, hymnum canit hunc libenter, Ut piis ejus meritis juvemur Omne per ævum. Sit salus illi, decus, atque virtus, Qui supra cœli residens cacumen, Totius mundi machinam gubernat, Trinus et unus. \subsection{Pro confessore pontifice} \paragraph{Ad Laudes} Jesu, redemptor omnium, Perpes corona præsulum, In hac die clementius Nostris faveto precibus, Tui sacri qua nominis Confessor almes claruit ; Hujus celebrat annua Devota plebs solemnia : Qui rite mundi gaudia Hujus caduca respuens, Cum angelis cœlestibus Lætus potitur præmiis. Hujus benignus annue Nobis sequi vestigia ; Hujus precatu servulis Dimitte noxam criminis. Sit, Christe, rex piissime, Tibi, Patrique gloria, Cum Spiritu Paraclito, Et nunc et in perpetuum. \subsection{Pro confessore non pontifice} \paragraph{Ad Laudes} Jesu, corona celsior, Et veritas sublimior, Qui confitenti servulo Reddis perenne præmium, Da supplicanli cœtui Obtentu hujus optimi, Remissionem criminum, Rumpendo nexum vinculi. Anni recurso tempore, Dies illuxit lumine, Quo sanctus hic de corpore Polum migravit præpotens. Hic vana terræ gaudia, Et luculenta prædia Polluta sorde deputans, Ovans tenet cœlestia. Te Christe, rex piissime, Hic confitendo jugiter, Calcavit hostem fortiter, Superbum ac satellitem, Virtute clarus et fide, Confessionis ordine, Jejuna membra deferens, Dapes supernas obtinet. Proinde te, piissime, Precamur omnes supplices, Ut hujus almi gratia Nobis remittas debita. Gloria Patri Domino ! Gloria unigenito, Una cum sancto Spiritu, In sempiterna sæcula ! \subsection{Pro virginibus} \paragraph{Ad Vesperas et Laudes} Jesu, corona virginum, Quem mater illa concipit Quæ sola virgo parturit, Hæc vota clemens accipe. Qui pascis inter lilia, Septus choreis virginum, Sponsus decorus gloria, Sponsisque reddens præmia : Quocumque pergis, virgines Sequuntur, atque laudibus Post te canentes cursitant, Hymnosque dulces personant. Te deprecamur, largius Nostris adauge sensibus Nescire prorsus omnia Corruptionis vulnera. Laus, honor, virtus, gloria, Deo Patri, et Filio, Sancto simul Paraclito, In sæculorum sæcula ! \paragraph{Ad Matutinum} Virginis proles, opifexque matris, Virgo quem gessit, peperitque virgo, Virginis festum canimus trophæum : Accipe votum. Hæc tua virgo, duplici beata Sorte, dum gestit fragilem domare Corporis sexum, domuit cruentum Corpore sæclum : Unde nec mortem, nec amica mortis Sæva pœnarum genera pavescens, Sanguine fuso meruit sacratum Scandere cœlum. Hujus obtentu, Deus alme, nostris Parce jam culpis, vitia remittens, Quo tibi puri resonemus almum Pectoris hymnum. Gloria Patri, genitæque proli, Et tibi compar utriusque semper Spiritus alme, Deus unus, omni Tempore sæcli ! \subsection{Pro nec virgine nec martyre} \paragraph{Ad Vesperas et Laudes} Fortem virili pectore Laudemus omnes feminam, Quæ sanctitatis gloria Ubique fulget inclyta. Hæc Christi amore saucia, Dum mundi amorem noxium Horrescit, ad cœlestia Iter peregit arduum. Carnem domans jejuniis, Dulcique mentem pabulo Orationis nutriens, Cœli potitur gaudiis. Rex Christe, virtus fortium. Qui magna solus efficis, Hujus precatu, quæsumus, Audi benignus supplices. Deo Patri sit gloria, Ejusque soli Filio, Cum Spiritu Paraclito, Et nunc et in perpetuum. \paragraph{Ad Matutinum} Hujus obtentu, Deus alme, nostris Parce jam culpis, vitia remittens, Quo tibi puri resonemus almum Pectoris hymnum. Gloria Patri, genitæque proli, Et tibi compar utriusque semper Spiritus alme, Deus unus, omni Tempore sæcli ! \subsection{In anniversario dedicationis ecclesiæ} \paragraph{Ad Vesperas et Matutinum} Urbs Jerusalem beata, Dicta pacis visio, Quæ construitur in cœlis Vivis ex lapidibus, Et angelis coronata, Ut sponsata comite ; Nova veniens e cœlo Nuptiali thalamo Præparata, ut sponsata Copuletur Domino : Plateæ et muri ejus Ex auro purissimo. Portæ nitent margaritis, Adytis patentibus ; Et virtute meritorum Illuc introducitur Omnis qui ob Christi nomen Hic in mundo premitur. Tunsionibus, pressuris Expoliti lapides Suis coaptantur locis Per manus artificis : Disponuntur permansuri Sacris ædificiis. Gloria et honor Deo, Usquequaque altissimo ! Una Patri, Filioque, Inclyto Paraclito, Cui laus est et potestas Per æterna sæcula ! \paragraph{Ad Laudes} Angularis fundamentum Lapis Christus missus est, Qui parietum compage In utroque nectitur, Quem Sion sancta suscepit In quo credens permanet. Omnis illa Deo sacra Et dilecta civitas, Plena modulis, in laude Et canore jubilo, Trinum Deum unicumque Cum fervore prædicat, Hoc in templo, summe Deus, Exoratus adveni, Et clementi bonitate Precum vota suscipe : Largam benedictionem Hic infunde jugiter. Hic promereantur omnes Petita acquirere, Et adepta possidere Cum sanctis perenniter, Paradisum introire, Translati in requiem. Gloria et honor Deo, Usquequaque altissimo ! Una Patri, Filioque, Inclyto Paraclito, Cui laus est et potestas Per æterna sæcula !