\section{Hymni proprii sanctorum}

\subsection{In omnibus festis Beatæ Virginis}

\paragraph{Ad Vesperas}

Ave maris stella, etc.

\paragraph{Ad Matutinum}

Quem terra, pontus, æthera, etc.

\paragraph{Ad Laudes}

O gloriosa domina, etc.

\subsection{In nativitate sancti Joannis Baptistæ}

24 junii

\paragraph{Ad Vesperas}

Ut queant laxis resonare fibris
Mira gestorum famuli tuorum,
Solve polluti labii reatum,
    Sancte Joannes.

Nuntius celso veniens Olympo,
Te patri magnum fore nasciturum,
Nomen, et vitæ seriem gerendæ
    Ordine promit.

Ille, promissi dubius superni,
Perdidit promptæ modulos loquelæ ;
Sed reformasti genitus peremptæ
    Organa vocis.

Ventris abstruso recubans cubili,
Senseras Regem thalamo manentem
Hinc parens nati meritis uterque
    Abdita pandit.

Gloria Patri, genitæque proli,
Et tibi compar utriusque semper
Spiritus alme, Deus unus, omni
    Tempore sæcli !

\paragraph{Ad Matutinum}

Antra deserti teneris sub annis,
Civium turmas fugiens, petisti,
Ne levi saltem maculare vitam
    Famine posses.

Præbuit hirtum tegumen camelus
Artubus sacris, strophium bidentes,
Cui latex haustum, sociata pastura
    Mella locustis.

Cæteri tantum cecinere vatum
Corde præsago jubar affuturum :
Tu quidem mundi scelus auferentem
    Indice prodis.

Non fuit vasti spatium per orbis
Sanctior quisquam genitus Joanne,
Qui nefas sæcli meruit lavantem
    Tingere lymphis.

Gloria Patri, genitæque proli,
Et tibi compar utriusque semper
Spiritus alme, Deus unus, omni
    Tempore sæcli !

\paragraph{Ad Laudes}

O nimis felix, meritique celsi,
Nesciens labem nivei pudoris,
Præpotens martyr, eremique cultor,
    Maxime vatum !

Serta ter denis alios coronant
Aucta crementis, duplicata quosdam :
Trina centeno cumulata fructu
    Te, sacer, ornant.

Nunc potens nostri meritis opimis
Pectoris duros lapides repelle,
Asperum planans iter, et reflexos
    Dirige calles,

Ut pius mundi sator et redemptor
Mentibus pulsa livione\footnote{\emph{Livione} n'est connu d'aucun dictionnaire latin, et s'est introduit dans les editions typiques du breviaire avant 1600. Diverses theories existent sur son origine. Corneille l'a traduit au hasard par \emph{envie}.} puris
Rite dignetur veniens sacratos
    Ponere gressus.

Laudibus cives celebrant superni
Te, Deus simplex pariterque trine :
Supplices et nos veniam precamur ;
    Parce redemptis.

\subsection{In festo sanctorum Petri et Pauli}

29 junii

\paragraph{Ad Vesperas et Matutinum}

Aurea luce et decore rosco,
Lux lucis, omne perfudisti sæculum,
Decorans cœlos inclyto martyrio,
Hac sacra die, quæ dat reis veniam.

Janitor cœli, doctor orbis pariter,
Judices sæcli, vera mundi lumina,
Per crucem alter, alter ense triumphans,
Vitæ senatum laureati possident.

O felix Roma, quæ tantorum principum
Es purpurata pretioso sanguine,
Non laude tua, sed ipsorum meritis
Excellis omnem mundi pulchritudinem.

Sit Trinitati sempiterna gloria,
Honor, potestas, atque jubilatio,
In unitate cui manet imperium,
Ex tunc, et modo per æterna sæcula.

\paragraph{Ad Laudes}

Jam bone pastor, Petre, clemens accipe
Vota precantum, et peccati vincula
Resolve, tibi potestate tradita
Qua cunctis cœlum verbo claudis, aperis.

Doctor egregie, Paule, mores instrue,
Et mente polum nos transferre satage,
Donec perfectum largiatur plenius.
Evacuato quod ex parte gerimus.

Sit Trinitati sempiterna gloria,
Honor, potestas, atque jubilatio,
In unitate cui manet imperium,
Ex tunc, et modo per æterna sæcula.

\subsection{In cathedra sancti Petri}

Romæ 18 januarii \textemdash Antochiæ 22 februarii

\paragraph{Ad Vesperas et Matutinum}

Quodcumque vinclis super terram strinxeris,
Erit in astris religatum fortifer ;
Et quod resolvis in terris arbitrio,
Erit solutum super cœli radium :
In fine mundi judex eris sæculi.

Gloria Patri per immensa sæcula !
Sit tibi, Nate, decus et imperium,
Honor, potestas, sanctoque Spiritui.
Sit Trinitati salus individua,
Per infinita sæculorum sæcula.

\subsection{In festo sancti Petri ad vincula}

prima die augusti

\paragraph{Ad Vesperas}

Petrus beatus catenarum laqueos,
Christo jubente, rupit mirabiliter :
Custos ovilis, et doctor ecclesiæ,
Pastorque gregis, conservator ovium,
Arcet luporum truculentem rabiem.

Gloria Patri per immensa sæcula !
Sit tibi, Nate, decus et imperium,
Honor, potestas, sanctoque Spiritui.
Sit Trinitati salus individua,
Per infinita sæculorum sæcula.

\subsection{In festo sanctæ Mariæ Magdalenæ}

22 julii

\paragraph{Ad Vesperas}

Pater superni luminis,
Cum Magdalenam respicis,
Flammas amoris excitas,
Geluque solvis pectoris.

Amore currit saucia
Pedes beatos ungere,
Lavare fletu, tergere
Comis, et ore lambere.

Adstare non timet cruci,
Sepulchro inhæret anxia,
Truces nec horret milites :
Pellit timorem charitas.

O vera, Christe, charitas,
Tu nostra purga crimina,
Tu corda reple gratia,
Tu redde cœli præmia.

Deo Patri sit gloria,
Ejusque soli Filio,
Cum Spiritu Paraclito,
Et nunc et in perpetuum.

\paragraph{Ad Matutinum}

Nardo Maria pistico
Unxit beatos Domini
Pedes, rigando lacrymis,
Et detergendo crinibus.

Honor, decus, imperium
Sit Trinitati unicæ,
Patri, Nato, Paraclito,
Per infinita sæcula.

\paragraph{Ad Laudes}

Æterni Patris unice,
Nos pio vultu respice,
Qui Magdalenam hodie
Vocas ad thronum gloriæ.

In thesauro reposita
Regis et drachma perdita,
Gemmaque luce inclyta
De luto luci reddita.

Jesu, dulce refugium,
Spes una pœnitentium,
Per peccatricis meritum
Peccati solve debitum.

Pia mater et humilis,
Naturæ memor fragilis,
In hujus vitæ fluctibus
Nos rege tuis precibus.

Uni Deo sit gloria,
Pro multiformi gratia,
Qui culpas et supplicia
Remittit, et dat præmia.

\subsection{In die Transfigurationis Jesus Christi}

6 augusti

\paragraph{Ad Vesperas et Matutinum}

Quicumque Christum quæritis,
Oculos in altum tollite :
Illic licebit visere
Signum perennis gloriæ.

Illustre quiddam cernimus
Quod nesciat finem pati,
Sublime, celsum, interminum,
Antiquius cœlo et chao.

Hic ille rex est gentium
Populique rex Judaici,
Promissus Abrahæ patri,
Ejusque in ævum semini.

Hunc, et prophetis testibus,
Isdemque signatoribus,
Testator et Pater jubet
Audire nos, et credere.

Gloria tibi, Domine,
Qui apparuisti hodie,
Cum Patre et sancto Spiritu,
In sempiterna sæcula !

\paragraph{Ad Laudes}

Amor Jesu dulcissime,
Quando cor nostrum visitas,
Pellis mentis caliginem,
Et nos reples dulcedine.

Quam felix est quem satias,
Consors paternæ dexteræ,
Tu veræ lumen patriæ,
Quod omnem sensum superat !

Splendor paternæ gloriæ,
Incomprehensa bonitas,
Amoris tui copiam
Da nobis per præsentiam.

Gloria tibi, Domine,
Qui apparuisti hodie,
Cum Patre et sancto Spiritu,
In sempiterna sæcula !

\subsection{In festibus sancti Michaelis}

8 maii (in apparitione) et 29 septembris (in dedicatione)

\paragraph{Ad Vesperas et Matutinum}

Tibi, Christe, splendor Patris,
Vita, virtus cordium,
In conspectu angelorum,
Votis, voce psallimus,
Alternantes concrepando
Melos damus vocibus.

Collaudamus venerantes
Omnes cœli milites,
Sed præcipue primatem
Cœlestis exercitus,
Michaelem in virtute
Conterentem zabulum :

Quo custode procul pelle,
Rex Christe piissime,
Omne nefas inimici,
Mundo corde et corpore :
Paradiso redde tuo
Nos sola clementia.

Gloriam Patri melodis
Personemus vocibus,
Gloriam Christo canamus.
Gloriam Paraclito,
Qui trinus et unus Deus
Exstat ante sæcula.

\paragraph{Ad Laudes}

Christe, sanctorum decus angelorum,
Rector humani generis et auctor,
Nobis æternum tribue benignus
        Scandere cœlum.

Angelum pacis Michael ad istam
Cœlitus mitti rogitamus aulam,
Nobis ut crebro veniente crescant
        Prospera cuncta.

Angelus fortis Gabriel, ut hostem
Pellat antiquum, volitet ab alto,
Sæpius templum veniens ad istud
        Visere nostrum.

Angelum nobis, medicum salutis,
Mitte de cœlis Raphael, ut omnes
Sanet ægrotos, pariterque nostros
        Dirigat actus.

Hinc Dei nostri genitrix Maria,
Totus et nobis chorus angelorum
Semper assistat, simul et beata
        Concio tota.

Præstet hoc nobis Deitas beata
Patris, ac Nati, pariterque sancti
Spiritus, cujus reboat in omni
        Gloria mundo.

\subsection{In festo sanctorum angelorum custodum}

prima die octobris

\paragraph{Ad Vesperas et Matutinum}

Custodes hominum psallimus angelos,
Naturæ fragili quos Pater addidit
Cœlestis comites, insidiantibus
    Ne succumberet hostibus ;

Nam quod corruerit proditor angelus,
Concessis merito pulsus honoribus,
Ardens invidia pellere nititur
    Quos cœlo Deus advocat.

Huc custos igitur pervigil advola,
Avertens patria de tibi credita
Tam morbos animi, quam requiescere
    Quicquid non sinit incolas

Sanctæ sit Triadi laus pia jugiter,
Cujus perpetuo numine machina
Triplex hæc regitur, cujus in omnia
    Regnat gloria sæcula.

\paragraph{Ad Laudes}

Orbis patrator optime,
Qui quicquid est potentia
Magna creasti, nec regis
Minore providentia,

Adesto supplicantium
Tibi reorum cœtui,
Lucisque sub crepusculum
Lucem novam da mentibus ;

Tuusque nobis angelus
Signatus ad custodiam,
Hic adsit, a contagio
Qui criminum nos protegat.

Serpentis nobis æmuli
Calumnias exterminet,
Ne rete fraudulentiæ
Incauta nectat pectora.

Metum propellat hostium
Nostris procul de finibus,
Pacem procuret civium,
Fugetque pestilentiam.

Deo Patri sit gloria,
Qui quos redemit Filius,
Et sanctus unxit Spiritus,
Per angelos cusiodiat.

\subsection{In festo sanctæ Teresiæ}

15 octobris

\paragraph{Ad Vesperas}

Regis superni nuntia,
Domum paternam deseris,
Terris, Teresa, barbaris
Christum datura, aut sanguinem.

Sed te manet suavior
Mors, pœna poscit dulcior :
Divini amoris cuspide
In vulnus icta concides.

O charitatis victima,
Tu corda nostra concrema,
Tibique gentes creditas
Averni ab igne libera.

Sit laus Patri cum Filio,
Et Spiritu Paraclito,
Tibique, sancta Trinitas,
Nunc et per omne sæculum.

\paragraph{Ad Matutinum}

Hæc est dies qua, candidæ
Instar columbæ, cœlitum
Ad sacra templa spiritus
Se transtulit Teresiæ ;

Sponsique voces audiit :
\fg Veni, soror, de vertice
Carmeli, ad Agni nuptias ;
Veni ad coronam gloriæ. \fg

Te, Christe, sponse virginum,
Beati adorent ordines,
Et nuptiali cantico
Laudent per omne sæculum.

\subsection{In festo omnium sanctorum}

prima die novembris

\paragraph{Ad Vesperas et Matutinum}

Christe, redemptor omnium,
Conserva tuos famulos,
Beatæ semper Virginis
Placatus sanctis precibus.

Beata quoque agmina
Cœlestium spirituum,
Præterita, præsentia,
Futura mala pellite.

Vates æterni judicis,
Apostolique Domini,
Suppliciter exposcimus
Salvari vestris precibus.

Martyres Dei inclyti,
Confessoresque lucidi,
Vestris orationibus
Nos ferte in cœlestibus.

Chori sanctarum virginum,
Monachorumque omnium,
Simul cum sanctis omnibus,
Consortes Christi facite.

Gentem auferte perfidam
Credentium de finibus,
Ut Christo laudes debitas
Persolvamus alacriter.

Gloria Patri ingenito,
Ejusque unigenito,
Una cum sancto Spiritu,
In sempiterna sæcula !

\paragraph{Ad Laudes}

Jesu, salvator sæculi,
Redemptis ope subveni,
Et pia Dei genitrix,
Salutem posce miseris.

Cœtus omnes angelici,
Patriarcharum cunei,
Et prophetarum merita,
Nobis precentur veniam.

Baptista Christi prævius,
Et claviger æthereus,
Cum cæteris apostolis,
Nos solvant nexu criminis.

Chorus sacratus martyrum,
Confessio sacerdotum,
Et virginalis castitas,
Nos a peccatis abluant.

Monachorum suffragia,
Omnesque cives cœlici,
Annuant votis supplicum,
Et vitæ poscant præmium.

Laus, honor, virtus, gloria
Deo Patri, et Filio,
Sancto simul Paraclito,
In sæculorum sæcula !